A Caniza acolleu con gran éxito o I Certame de Moda para Deseñadores Noveles José Castro

• O Auditorio da Casa de Cultura celebrou este sábado unha gala que rendeu homenaxe ao deseñador canicense José Castro e que puxo en valor o talento das novas xeracións da moda.

   

O Auditorio Municipal da Caniza acolleu este 12 de setembro o «I Certame de Moda para Deseñadores Noveles José Castro», unha iniciativa organizada pola Asociación Cultural e Artística Jose Castro», que contou coa colaboración do Concello e que conseguiu emocionar aos asistentes nunha xornada marcada polo talento e o recordo a un dos grandes referentes da moda nacido na Caniza.

O Alcalde da Caniza, que tamén estivo presente no Certame, acompañado polos Concelleiros de Goberno María José Rodríguez, Paula Bacelar e Rubén Muiños, trasladou a súa felicitación e recoñecemento á Asociación Cultural e Artística Jose Castro, á familia do deseñador e a todo o equipo humano implicado no certame (máis de 60 profesionais), polo éxito acadado, subliñando a importancia de seguir facendo medrar o legado do deseñador canicense.

Luis Piña puxo en valor a figura de José Castro, ao que definiu como un home extraordinario e un referente da moda a nivel nacional, cuxa traxectoria internacional levou o nome da Caniza a importantes escenarios do mundo do deseño. Neste sentido, destacou a importancia de que o seu legado continúe impulsando iniciativas que, ademais de recoñecer a súa traxectoria profesional, permitan xerar novas oportunidades para as xeracións futuras.

O certame reuniu a nove «novas» deseñadoras finalistas, que presentaron as súas coleccións ante o público asistente e ante un xurado integrado por profesionais vinculadas á traxectoria do deseñador homenaxeado.

As propostas participantes foron:

• NOCONT-ROLES, de Nerea Vázquez Giráldez.

• @THEBIRTHDAYGIRL, de Rosalía Novas Martínez.

• DUENDE, de Noa Vázquez.

• A-1, de Frifri.

• SEREIA, de Paula Pereira/P3XPE.

• INOCENCIA, de Laura Griffo.

• HARUKI, de Studio Marta Pujales.

• CON NÓS, de Manuela Herranz.

• A PORTRAIT OF ME AND GALICIA, de Uxía Loureiro Caamaño/Clouxi.

O premio único, dotado con 1.000 euros, foi para Marta Pujales, pola súa colección HARUKI. O xurado destacou da súa proposta, entre outros aspectos, o traballo de investigación realizado, a utilización das superficies téxtiles e a paleta de cor para trasladar os conceptos da colección, así como o nivel técnico na construción das siluetas, patronaxe e a manipulación téxtil.

O Alcalde tamén quixo destacar a participación neste concurso de dúas deseñadoras da Caniza, Nerea Vázquez Giráldez e África Álvarez (Frifri), ás que felicitou polos seus traballos, desexándolles grandes éxitos na súa etapa profesional.

Máis alá da competición, a xornada converteuse nunha homenaxe a José Castro e nunha proposta cultural multidisciplinar que combinou moda, música, poesía e artes escénicas. A programación contou coas actuacións de Mónica Flyn, Pedro JG, Xisco Feijóo e Samuel Merino, ademais dunha videohomenaxe ao deseñador realizada por Alba Casas.

Con esta primeira edición, A Caniza rende homenaxe á memoria de José Castro e abre unha nova vía para que o seu nome e o seu legado continúen vinculados ao apoio a mozos creadores e á promoción da cultura e o talento.

Noraboa e parabéns por todo o conseguido nesta 1ª Edición.